मनिला । फिलिपिन्सको दक्षिणी क्षेत्रलाई केन्द्रविन्दु बनाएर ७ म्याग्निच्युडको शक्तिशाली भूकम्प गएको छ। भूकम्पपछि फिलिपिन्स, इन्डोनेसिया, जापान लगायत प्रशान्त महासागरीय क्षेत्रका विभिन्न देशहरूले सुनामीको चेतावनी जारी गरेका छन्।
आज बिहान फिलिपिन्सको मुख्य दक्षिणी टापु मिन्डानाओ नजिकको तटीय क्षेत्रलाई केन्द्रविन्दु बनाएर भूकम्प गएको अन्तर्राष्ट्रिय सञ्चारमाध्यमहरूले जनाएका छन्। शक्तिशाली भूकम्पपछि समुद्रमा असामान्य छाल उत्पन्न हुन सक्ने सम्भावनालाई ध्यानमा राख्दै सम्बन्धित देशहरूले तटीय क्षेत्रमा उच्च सतर्कता अपनाएका छन्।
भूकम्पलगत्तै फिलिपिन्स सरकारले उद्धार, राहत तथा सुरक्षा तयारीलाई तीव्र बनाउन सम्बन्धित निकायलाई निर्देशन दिएको छ। तटीय क्षेत्रमा बसोबास गर्ने नागरिकलाई सुरक्षित स्थानतर्फ जान र सरकारी निर्देशनको पालना गर्न आग्रह गरिएको छ।
अहिलेसम्म भूकम्पबाट भएको मानवीय वा भौतिक क्षतिको विस्तृत विवरण सार्वजनिक भएको छैन। यद्यपि, सम्भावित जोखिमलाई मध्यनजर गर्दै प्रशान्त क्षेत्रका विभिन्न देशहरूले समुद्री सतहमा हुने गतिविधिको निगरानी बढाएका छन्।
सरकारी अधिकारीहरूले नागरिकलाई अफवाहको पछि नलाग्न, आधिकारिक सूचना मात्र विश्वास गर्न तथा स्थानीय प्रशासनको निर्देशन पालना गर्न अनुरोध गरेका छन्। भूकम्पपछि प्रभावित क्षेत्रको अवस्था मूल्याङ्कन गर्ने कार्य जारी रहेको जनाइएको छ।
