पाल्पा। पाल्पाको त्रिभुवन बहुमुखी क्याम्पस, तानसेनमा यसपटक अनेरास्ववियु क्रान्तिकारीका मिलन घर्ती मगर स्वतन्त्र विद्यार्थी युनियन (स्ववियु) सभापति पदमा विजयी भएका छन्। तीन दशकदेखि वर्चस्व जमाउँदै आएको नेपाली कांग्रेस निकट नेपाल विद्यार्थी संघलाई पराजित गर्दै नेकपा माओवादी सम्बद्ध अनेरास्ववियु क्रान्तिकारीका घर्ती सभापति बनेका हुन्।
उनले ३९० मत प्राप्त गर्दै नेपाल विद्यार्थी संघका कृष्ण अर्याललाई ४८ मतको अन्तरले पराजित गरे।
सभापति पदका लागि प्रतिस्पर्धामा रहेका नेकपा एमाले निकट अनेरास्ववियुका अनुजा अर्यालले २८७ मत, समाजवादी निकट अनेरास्ववियुका उमेश भण्डारीले १८५ मत प्राप्त गरेको निर्वाचन अधिकृत जीवन बहादुर थापाले जानकारी दिए।
सचिव पदमा भने नेपाल विद्यार्थी संघका सुशील बस्याल ५१७ मत प्राप्त गरी विजयी भए। उनका निकटतम प्रतिस्पर्धी अखिल क्रान्तिकारीका विपिन पंगेनीले ३३२ मत ल्याए।
कोषाध्यक्ष पदमा पनि नेपाल विद्यार्थी संघले जित हात पार्यो। नेविसंघकी मिस्मा रानाले ४१६ मत प्राप्त गर्दै विजय हासिल गरिन्। उनका प्रतिस्पर्धी गंगादेवी बाह्रघरेले ३४५ मत प्राप्त गरिन्।
स्ववियु निर्वाचनमा विभिन्न पदका लागि उम्मेदवारबीच रोचक प्रतिस्पर्धा देखिएको थियो। सदस्य पदमा नेविसंघका आशिका विश्वकर्मा (३९०), ज्योति दर्लामी (४२६), तोरण रास्कोटी (३८७), नवीन थापा (३९८), बबिता थापा (४०५) र सुजल भट्टराई (४५२) विजयी भए।
त्यस्तै, अखिल क्रान्तिकारीबाट इच्छा थापा ३६० मतसहित निर्वाचित भइन्।
स्ववियु निर्वाचनमा १,८९४ मतदाता मध्ये १,२२८ मत खसेको थियो।
