बागलुङको बरेङ गाउँपालिका वडा नं. ३ बाटाकाचौर घर भै काठमाण्डौमा व्यवसाय सञ्चालन गर्दै आएका भिम प्रसाद पौडेल नेकपा (एमाले) छोडी राष्ट्रिय जनमोर्चामा प्रवेश गरेका छन् ।

राष्ट्रिय जनमोर्चामा सक्रियता पूर्वक कार्यरत रहेका पौडेल काठमाण्डौ व्यवसायमा पुगे लगत्तै वि.स. २०५८ फागुनमा नेकपा (एमाले) मा प्रवेश गरेका थिए भने उनलाई नेकपा (एमाले) बागलुङ–काठमाण्डौ सम्पर्क समितिका सदस्य समेत बनाएका थिए ।

पौडेलले विगतमा नेकपा (एमाले) मा प्रवेश गर्नु आफ्नो भुल भएको भन्दै नेकपा (एमाले) ले लिएको नीति, सिद्धान्त, पार्टीले लिएको राष्ट्रघाती नीतिका कारण नेकपा (एमाले) को कुनै पिन पदमा नरहने गरि वि.स. २०८१ जेष्ठमा राजिनामा दिएको जानकारी गराउदैं पुनः राष्ट्रिय जनमोर्चामा प्रवेश गरेको भिम प्रसाद पौडेलद्वारा हस्ताक्षरित विज्ञप्तिमा उल्लेख गरेका छन् ।

राष्ट्रिय जनमोर्चामा प्रवेश गरे लगत्तै राष्ट्रिय जनमोर्चा केन्द्रिय सदस्य राजेन्द्र ढुङ्गानाले पौडेललाई राष्ट्रिय जनमोर्चाको सदस्यता प्रदान गरेका छन् भने राष्ट्रिय जनमोर्चामा रहि जिम्मेवार पूर्वक पार्टीको जिम्मेवारी निभाउने प्रतिवद्धता समेत गरेका छन् ।