मुस्ताङ, ११ कात्तिक २०८२ – लगातार तीन वर्षपछि मुस्ताङमा कात्तिकमै भारी हिमपात भएको छ, जसले कृषि, पर्यटन र जैविक विविधतामा सकारात्मक प्रभाव पार्ने अपेक्षा गरिएको छ।
स्थानीय कृषकहरूले बताए अनुसार, हिमपातले अन्नबाली उत्पादन गर्ने जमिनको माटोलाई मुलायम बनाउने र जमिनको भित्री तहसम्म ‘रिचार्ज’ गर्ने भएकाले कृषि उपजका लागि हिउँ पर्नु शुभ संकेत मानिन्छ।
मुक्तिनाथ क्षेत्रमा परेको भारी हिमपातले दर्शनार्थीलाई केही समस्या सिर्जना गरेको छ। प्रशासनले उच्च स्थानमा यात्रा नगर्न स्थानीय र पर्यटकहरूलाई अनुरोध गरेको छ।
साथै, हिमपातले पशुपालनका लागि चरन क्षेत्र सहज हुने र राष्ट्रिय स्की प्रतियोगिता आयोजना गर्ने सम्भावना बढाएको मुक्तिनाथका स्थानीयले बताएका छन्।
