बुटवल, कार्तिक १४ गते।

नेकपा (मसाल) ले प्रतिनिधिसभा पुनःस्थापना भए त्यसलाई स्वागत गर्ने र आमचुनाव भए त्यसमा भाग लिने निर्णय गरेको छ। बुटवलस्थित सिद्धार्थ कटेजमा शुक्रबार आयोजित पत्रकार सम्मेलनमा महामन्त्री मोहनविक्रम सिंहले उक्त निर्णय सार्वजनिक गरे।

महामन्त्री सिंहका अनुसार हालै सम्पन्न मसालको केन्द्रीय समिति बैठकले प्रतिनिधिसभा विघटनलाई असंवैधानिक ठहर गर्दै पुनःस्थापना भए समर्थन जनाउने र आगामी फागुन २१ गते हुने भनिएको आमचुनावलाई वैचारिक भण्डाफोर अभियानको रूपमा उपयोग गर्ने निर्णय गरेको हो।

पत्रकार सम्मेलनमा प्रस्तुत प्रेस विज्ञप्तिमा मसालले देशमा देखिएको राजनीतिक संकट, जेनजी आन्दोलन, अन्तरिम सरकार गठन र विदेशी हस्तक्षेपबारे विस्तृत मूल्याङ्कन गरेको छ। सिंहले भने, “अहिले बनेको अन्तरिम सरकार अवैधानिक हो। प्रतिनिधिसभा विघटन असंवैधानिक छ। यी कदमहरूले लोकतान्त्रिक अभ्यासमाथि चोट पुर्‍याएका छन्।”

जेनजी आन्दोलनबारे विश्लेषण

मसालले जेनजी आन्दोलनलाई भ्रष्टाचार र सामाजिक सञ्जालमाथिको नियन्त्रणविरुद्धको स्वाभाविक विस्फोटको रूपमा व्याख्या गरे पनि त्यसमा अमेरिकी साम्राज्यवाद र अन्य बाह्य शक्तिको घुसपैठ रहेको ठहर गरेको छ। विज्ञप्तिमा भनिएको छ, “अमेरिकी साम्राज्यवादले आफ्नो इन्डोप्यासिफिक रणनीतिअन्तर्गत नेपाललाई प्रयोग गर्न खोजिरहेको छ। अहिलेको अन्तरिम सरकार र त्यसको निर्माण प्रक्रिया पनि त्यसकै रणनीतिक लक्ष्यको भाग हो।”

सिंहले भदौ २३ र २४ गतेका घटनाबारे बोल्दै भने, “भदौ २३ गते शान्तिपूर्ण आन्दोलनमाथि गरिएको गोली प्रहारको निष्पक्ष छानबिन हुनुपर्छ। त्यसको जिम्मेवारीबाट ओली सरकार उम्कन सक्दैन।”
उनका अनुसार २४ गते भएका तोडफोड र आगलागीका घटनामा बाह्य तत्त्वको संलग्नता देखिन्छ। “जेनजी आन्दोलनको वास्तविक स्वरूप शान्तिपूर्ण थियो, तर त्यसमा गलत तत्व घुसाइयो,” उनले भने।

राजमोमाथिको आक्रमणबारे

मसालले जेनजी आन्दोलनका क्रममा बुटवल, प्युठान, अर्घाखाँची र सुर्खेतस्थित राष्ट्रिय जनमोर्चाका कार्यालयमा भएका आक्रमण र आगलागीको भत्र्सना गरेको छ। विज्ञप्तिमा भनिएको छ, “राष्ट्रिय जनमोर्चाले कहिल्यै भ्रष्टाचार गरेको छैन। त्यसैले ती आक्रमणहरू आन्दोलनभित्रका गलत तत्त्वबाट गरिएका हुन्।”

संविधान र शासन प्रणालीबारे धारणा

मसालले संविधान खारेज गर्ने वा प्रत्यक्ष निर्वाचित कार्यकारी प्रमुख ल्याउने प्रस्तावलाई अस्वीकार गरेको छ। सिंहले भने, “नेपाल जस्तो देशमा प्रत्यक्ष निर्वाचित प्रमुख ल्याउने कुरा अधिनायकवादको ढोका खोल्ने प्रयास हो।”
उनले संविधानभित्रको संघीयता प्रणालीलाई भने खारेज गर्नुपर्ने र गणतन्त्र, धर्मनिरपेक्षता, मौलिक अधिकार र बहुदलीय व्यवस्थालाई जोगाउनुपर्ने बताए।

भ्रष्टाचार र राजनीतिक संस्कृति

मसालले चुनाव प्रणालीमै सुधार नगरेसम्म देशमा सुशासन सम्भव नहुने ठहर गरेको छ। सिंहले जोड दिए, “चुनावमा पैसा बाँड्ने, ठेक्का र पहुँचका आधारमा सत्तामा पुग्ने प्रवृत्ति अन्त्य नभएसम्म विकास असम्भव छ।”
विज्ञप्तिमा उल्लेख छ, “देशमा कुशासनको मूल कारण नै भ्रष्ट चुनावी प्रणाली हो। जनताले इमानदार र निष्कलंक दलहरूलाई जिताउन सके मात्र देशको विकास सम्भव छ।”

पुस्तान्तरणको विषयमा टिप्पणी

उमेरलाई मात्र नेतृत्वको आधार बनाउने सोचलाई मसालले अस्वीकार गरेको छ। पार्टीको भनाइ छ, “नेतृत्वका लागि सोच, दृष्टिकोण र इमान्दारिता नै मुख्य मापदण्ड हुनुपर्छ, उमेर होइन।”

कार्यक्रमको विवरण

प्रगतिशील पत्रकार संघ नेपालको केन्द्रीय कार्यालयद्वारा आयोजित कार्यक्रममा अध्यक्ष श्यामलाल पोखरेलको अध्यक्षता र धनविर पुनमगरको सञ्चालन थियो। कार्यक्रममा राष्ट्रिय जनमोर्चाका अध्यक्ष चित्रबहादुर केसी र नेता बासुदेव पोखरेल पनि सहभागी थिए। केसीले पत्रकारहरूको प्रश्नको उत्तर दिएका थिए भने पोखरेलले प्रेस विज्ञप्ति वाचन गरेका थिए।

यसरी शुक्रबार बुटवलमा आयोजित पत्रकार सम्मेलनले मसालको राजनीतिक दृष्टिकोण र देशको वर्तमान परिस्थितिप्रतिको स्पष्ट धारणा सार्वजनिक गरेको छ —
प्रतिनिधिसभा पुनःस्थापना भए स्वागत, चुनाव भए राजनीतिक भण्डाफोर अभियानमार्फत सहभागिता।