काठमाडौँ, मंसिर ११। बुढानीलकण्ठ नगरपालिका–१० स्थित सुकुन्डा वेङ्केट हलमा आज विहान अन्तर्राष्ट्रिय महिला सेमिनारको भव्य उद्घाटन सम्पन्न भएको छ। तीन दिनसम्म चल्ने यस सेमिनारमा विश्वका विभिन्न देशका प्रतिनिधिहरू सहभागी भएका छन्।
उद्घाटन कार्यक्रम विहान १० बजेदेखि सुरु भई १२ बजेसम्म चलेको थियो। विभिन्न महादेशका को–अर्डिनेटरहरूले संयुक्त रूपमा दीप प्रज्वलन गर्दै सेमिनारको उद्घाटन गरेका थिए। उद्घाटनका सहभागीहरूमा एशिया को–अर्डिनेटर दुर्गा पौडेल, अफ्रिका को–अर्डिनेटर मालि पोला, ल्याटिन अमेरिका को–अर्डिनेटर एरिक लुसा, युरोप को–अर्डिनेटर नताली, करोला क्युरिन, सुसिवारा तथा मिडिल इस्ट को–अर्डिनेटर डिलार्ज रहे।
करीब चार सयभन्दा बढी महिला प्रतिनिधि उपस्थित कार्यक्रममा विभिन्न महिला संगठनका नेतृहरूले शुभकामना मन्तव्य दिएका थिए। वक्तामध्ये अखिल नेपाल महिला संघकी अध्यक्ष मिना पुन, क्रान्तिकारी महिला संघकी अम्बिका मुखरी, अखिल नेपाल महिला क्रान्तिकारीकी दामा शर्मा, समाजवादी महिला संघकी कमला विश्वकर्मा, वैज्ञानिक समाजवादी महिला संघकी राजेश्वरी लगायतका नेतृहरू रहेका थिए।
सेमिनारमा युरोप को–अर्डिनेटर नतालियाले पठाएको लिखित शुभकामना सन्देश समेत प्रस्तुत गरिएको थियो। उनले विश्वभर साम्राज्यवादले श्रमजीवी वर्गमाथि गरेको शोषणको चर्चा गर्दै सेमिनारले महिला अधिकार, शान्ति, स्वच्छता र विश्वमै मानवीय ऐक्यवद्धता अभिवृद्धिमा योगदान पुर्याउने विश्वास व्यक्त गरिन्।
नेपाल कम्युनिस्ट पार्टी (मसाल) का महामन्त्री मोहनविक्रम सिंह, नेकपा संयोजक पुष्पकमल दाहाल ‘प्रचण्ड’, नेकपा (माओवादी)का महासचिव नेत्रविक्रम चन्द, क्रान्तिकारी कम्युनिस्ट पार्टीका महासचिव सिपी गजुरेल तथा जर्मन कम्युनिस्ट पार्टी (एमएलपिडी) ले पनि लिखित शुभकामना पठाएका थिए।
यसैगरी अफ्गानिस्तान कम्युनिस्ट पार्टी महिला समितिले भिडियो सन्देश पठाउँदै अफ्गानिस्तानमा महिलामाथि भइरहेका अत्याचारलाई अन्तर्राष्ट्रिय समुदाय सामु उजागर गर्न सेमिनार महत्वपूर्ण हुने विश्वास व्यक्त गरेको थियो।
आयोजकका अनुसार दिउँसो १ बजेदेखि महिला अधिकार, साम्राज्यवाद, पर्यावरण लगायतका विषयमा विभिन्न देशका प्रतिनिधिहरूले कार्यपत्र तथा धारणा प्रस्तुत गर्ने कार्यक्रम रहेको छ।
मंसिर ११ देखि १३ गतेसम्म चल्ने यो सेमिनार तीन दिनसम्म निरन्तर सञ्चालन हुनेछ।
