नारायण जिसी , प्युठान मच्छी ,शंकर प्रसाद पोख्रेल ,बुटवल ।
प्यूठान, झिमरुक–४ बाङ्गेफेदीस्थित श्री लक्ष्मी माध्यमिक विद्यालयमा शिक्षा प्रवर्द्धन तथा सामाजिक दायित्वसहित अक्षयकोष स्थापना गरिएको छ। झिमरुक गाउँपालिकाका संस्थापक अध्यक्ष तथा विद्यालयका पूर्व व्यवस्थापन समिति अध्यक्ष तिलक बहादुर जि.सी ले आफ्ना पिता *चित्र बहादुर जि.सी. को चौरासी वर्ष पुगेको अवसरमा रु. १,०१,१५१/- (एक लाख एक हजार एक सय एकाउन्न रुपैयाँ) को ‘चित्र बहादुर जि.सी.–लक्ष्मी मा.वि. अक्षयकोष’ स्थापना गर्नुभएको हो।
त्यस्तै, भिमसेन आधारभूत विद्यालय, झिमरुक–४ बौडामा पनि समान रकम रु. १,०१,१५१/- को ‘चित्र बहादुर जि.सी.–भिमसेन आ.वि. अक्षयकोष’ स्थापना गरिएको छ।
दुवै अक्षयकोषको कुल राशि रु. २,०२,३०२/- (दुई लाख दुई हजार तीन सय दुई) पुगेको विद्यालयले जनाएको छ।
औपचारिक समारोहमार्फत अक्षयकोष हस्तान्तरण
अक्षयकोष हस्तान्तरणको लागि विद्यालयले विशेष समारोहको आयोजना गरेको थियो।
कार्यक्रममा
जिल्ला समन्वय समितिका प्रमुख धरम जि.सी. प्रमुख आतिथ्य,
शिक्षाप्रेमी चित्र बहादुर जि.सी. विशिष्ट आतिथ्य,
अक्षयकोष संरक्षक तिलक जि.सी. र हरी जि.सी. विशेष आतिथ्य
रहेका थिए।
कार्यक्रम श्री लक्ष्मी मा.वि. व्यवस्थापन समिति अध्यक्ष प्रेम बहादुर पुनको अध्यक्षतामा र प्रधानाध्यापक कर्ण बहादुर जि.सी.को सञ्चालनमा सम्पन्न भएको हो।
दुवै विद्यालयका प्रतिनिधिहरूले अक्षयकोष दाताप्रति आभार व्यक्त गर्दै यस योगदानले विपन्न विद्यार्थीको भविष्य उज्यालो बनाउन महत्त्वपूर्ण टेवा पुग्ने बताए।
अक्षयकोषबाट विपन्न विद्यार्थीलाई छात्रवृत्ति
विद्यालयका अनुसार, अक्षयकोषबाट उत्पन्न ब्याज रकम गरीब, दलित तथा आर्थिक रूपमा कमजोर विद्यार्थीहरूलाई छात्रवृत्ति वितरणमा उपयोग गरिने छ। विद्यालय समुदायले यो पहललाई दीर्घकालीन शैक्षिक लगानीका रूपमा लिएको छ।
