शंकर प्रसाद पोख्रेल
बुटवलमा पछिल्ला दिनयता शीतलहरको प्रभाव बढ्दै गएको छ। चिसो हावा र कुहिरोका कारण बिहान र साँझको समयमा अत्यधिक चिसो महसुस गरिएको छ, जसले दैनिक जनजीवन प्रभावित बनेको छ।
शीतलहरका कारण बालबालिका, ज्येष्ठ नागरिक तथा दीर्घरोगीहरू बढी प्रभावित भएका छन्। चिसोका कारण विद्यालय जाने बालबालिकाको उपस्थिति घटेको छ भने बिहान सबेरै खुल्ने पसल तथा बजारमा समेत चहलपहल कम देखिएको छ।
चिसो बढेसँगै रुघाखोकी, ज्वरो तथा श्वासप्रश्वाससम्बन्धी समस्या देखिने बिरामीको संख्या बढ्न थालेको स्वास्थ्यकर्मीहरूले बताएका छन्। उनीहरूले न्यानो कपडा लगाउन, तातो खानेकुरा सेवन गर्न र आवश्यक नभए बाहिर ननिस्कन सर्वसाधारणलाई सुझाव दिएका छन्।
स्थानीय प्रशासनले शीतलहरबाट जोखिममा परेका समुदायप्रति सतर्क रहन आग्रह गर्दै आवश्यक परे सहयोगका कार्यक्रम सञ्चालन गरिने जनाएको छ।
