भैरहवा । नेपाल पत्रकार महासंघ, रुपन्देहीले समाचार संकलनका क्रममा एपीवान टेलिभिजनका संवाददाता राधेश्याम विश्वकर्मामाथि भएको आक्रमण प्रयासमा संलग्नमाथि तत्काल कारबाहीको माग गरेका छन्। रुपन्देहीको मायादेवी गाउँपालिका–६, मर्चवारमा सोमबार तस्करहरुको समूहले पत्रकार विश्वकर्मामाथि आक्रमण प्रयास गरेका थिए।
मंगलबार रुपन्देहीका प्रमुख जिल्ला अधिकारी बासुदेव घिमिरेलाई ज्ञापनपत्र बुझाउँदै नेपाल पत्रकार महासंघ रुपन्देही अध्यक्ष दिनेश पाण्डेले समाचार संकलनका लागि हिंडेको पत्रकारलाई घेराबन्दी गरी संचार उपकरणमा क्षति पुर्याउनु, दुब्र्यवहार गर्नु र खिचिएको भिडियो मेटाउन लगाउनु प्रेस स्वतन्त्रता विरोधी गतिविधि भएको बताए। ‘त्यस्ता व्यक्ति र समूहलाई कडाभन्दा कडा कारबाही होस्’, ज्ञापन पत्रमा भनिएको छ, ‘स्थानीय प्रहरी अधिकारीकै उपस्थितिमा क्यामेरा खोसेर दृश्य हटाउन बाध्य तुल्याउनु प्रेस स्वतन्त्रता विपरीत कार्य हो।’महासंघले बुझाएको ज्ञापनपत्रमा उल्लेख छ।
पाण्डेले समाचार संकलनमा खटिएका पत्रकारमाथि सामूहिक आक्रमणको प्रयास हुनु आफैंमा संवेदनशील विषय भएको बताए। क्यामेरामा कैद गरिएका दृश्य प्रहरीकै सामु हटाउन लगाउनु अत्यन्त गम्भीर बिषय भएको जनाउँदै उनले झन पक्राउ परेर प्रहरी हिरासतमा रहेका भनिएका व्यक्ति भाग्नु गम्भीर लापरबाही भएको बताए। महासंघले घटनालाई सामान्य रुपमा नलिन र दोषी पक्राउ गरेर तत्काल कारबाही गर्न माग गरेको छ।
तस्करहरुको एउटा समूहले सामान ओसारपसार गरिरहेको दृश्य खिच्ने क्रममा सोमवार पत्रकार विश्वकर्मालाई घेरा हालेर भौतिक आक्रमण प्रयास गरेको र क्यामेरामा कैद गरिएका दृश्य हटाउन बाध्य पारेको थियो।
यस्तै, महासंघका केन्द्रिय सदस्य रामराज पोखरेलले घटनालाई सामान्य रुपमा नलिइ संलग्नलाई कारबाहीको माग गरे।
त्यसैगरी लुम्बिनी प्रेस क्लवका महासचिव प्रकाश न्यौपाने र अध्यक्ष कमल रायमाझीद्वारा हस्ताक्षरित ज्ञापनपत्रमा घटनाको जानकारी गराउने बित्तिकै प्रहरीले आक्रमण प्रयासमा संलग्न आरोपी दीपेश यादव पक्राउ परिसकेको जनाएको उल्लेख छ।
‘प्रहरीले दिउँसो आरोपी पक्राउ परिसकेको र कारबाहीको दायरामा ल्याइने जनाए पनि सोमबार साँझ यादव पक्राउ नै नपरेको दावी गर्नुले घटनामा सुरक्षा निकायको मिलेमतोको आंशका बलियो भएको’, प्रेस क्लवले बुझाएको ज्ञापनपत्रमा भनिएको छ।
ज्ञापन पत्र बुझ्दै प्रमुख जिल्ला अधिकारी घिमिरेले स्वतन्त्र रुपमा समाचार संकलन गर्ने क्रममा पत्रकारमाथि आक्रमण प्रयास गरिनु दुःखद भएको जनाए। क्यामेरामा कैद गरिएका दृश्य प्रहरीकै सामुन्ने हटाउन लगाएको साँचो भए झन गम्भीर भएको जनाउँदै यसबारे छानबीन गरेर दोषीलाई कारबाहीको दायरामा ल्याइने बताएकाछन ।
