शंकर प्रसाद पोख्रेल १८ पुस ,
प्रत्येक हप्ता बुटवल बजार सरसफाइ गरिने
बुटवल । बुटवल उपमहानगरपालिकाको प्रमुख व्यावसायिक तथा सार्वजनिक क्षेत्र नयाँ बसपार्कबाट आजदेखि नियमित सरसफाइ अभियान सुरु गरिएको छ। सहिद बेपत्ता स्मृति प्रतिष्ठानको आयोजना तथा बुटवल उपमहानगरपालिकाको समन्वयमा सुरु गरिएको उक्त अभियान अबदेखि प्रत्येक हप्ता निरन्तर रूपमा सञ्चालन गरिने आयोजक तथा सरसफाइ अभियन्ताहरूले बताएका छन्।
बढ्दो सहरीकरण, जनघनत्व र अव्यवस्थित फोहोर व्यवस्थापनका कारण बुटवल बजार क्षेत्रमा सरसफाइ चुनौती बन्दै गएको सन्दर्भमा यो अभियानलाई दीर्घकालीन समाधानतर्फको महत्वपूर्ण पहलका रूपमा लिइएको छ। अभियानको मुख्य उद्देश्य सार्वजनिक स्थानहरूलाई सफा, सुन्दर र स्वास्थ्यकर बनाउँदै स्वच्छ सहर निर्माणमा सबैको साझा सहभागिता सुनिश्चित गर्नु रहेको आयोजकले जनाएका छन्।
नयाँ बसपार्क क्षेत्रबाट सुरु गरिएको सरसफाइ कार्यक्रममा सडक, बसपार्क परिसर, नालाहरू तथा सार्वजनिक स्थानमा जम्मा भएको फोहोर संकलन गरिएको थियो। कार्यक्रममा स्थानीयवासी, विद्यार्थी, विभिन्न संघ–संस्थाका प्रतिनिधि, सुरक्षाकर्मी तथा सञ्चारकर्मीहरूको उल्लेखनीय सहभागिता रहेको थियो।
सरसफाइ कार्यक्रममा बुटवल उपमहानगरपालिकाका मेयर खेलराज पाण्डे र उपमेयर साबित्रा देबि अर्याल (उपप्रमुख)को विशेष उपस्थिति रहेको थियो। कार्यक्रममा बोल्दै मेयर पाण्डेले सरसफाइ केवल नगरपालिकाको मात्र दायित्व नभई सम्पूर्ण नागरिकको साझा जिम्मेवारी भएको बताए। उनले स्वच्छता अभियानलाई निरन्तरता दिँदै बुटवललाई सफा, हरित र व्यवस्थित सहरका रूपमा विकास गर्ने प्रतिबद्धता व्यक्त गरे।
मेयर पाण्डेले भने, “स्वच्छ बुटवल हाम्रो अभियान हो। आज नयाँ बसपार्कबाट सुरु भएको यो सरसफाइ अभियान अब बुटवलका सम्पूर्ण बजार क्षेत्र, चोक र सार्वजनिक स्थलसम्म विस्तार गरिनेछ। प्रत्येक हप्ता नियमित सरसफाइ गरी नागरिकमा स्वच्छताप्रति चेतना फैलाउने हाम्रो लक्ष्य हो।
शहीद बेपत्ता स्मृति प्रतिष्ठान नेपालका अध्यक्ष बसन्त कुमार श्रेष्ठले बुटवलमा सुरु गरिएको सरसफाइ अभियान सफल बनाउन सहयोग पुर्याउने सम्पूर्ण पक्षप्रति हार्दिक धन्यवाद व्यक्त गर्नुभयो। उहाँले यस अभियानमा सक्रिय रूपमा सहभागी भएका विभिन्न संघ–संस्थाका प्रतिनिधि, सञ्चारकर्मी, विद्यार्थी, सुरक्षाकर्मी तथा बुटवल उपमहानगरपालिकाप्रति विशेष आभार प्रकट गर्नुभयो। उहाँका अनुसार सरसफाइ केवल एकदिने कार्यक्रम नभई निरन्तर रूपमा अघि बढाउनुपर्ने सामाजिक दायित्व हो। स्वच्छ र सुन्दर शहर निर्माणका लागि सबै नागरिकको सहभागिता अपरिहार्य रहेको उहाँले बताउनुभयो। अध्यक्ष श्रेष्ठले आगामी दिनहरूमा पनि यस्ता सकारात्मक अभियानमा सबैको सहकार्य रहने विश्वास व्यक्त गर्दै, बुटवललाई सफा, व्यवस्थित र स्वस्थ शहरका रूपमा विकास गर्न सामूहिक प्रयास आवश्यक रहेको उल्लेख गर्नुभयो। अन्त्यमा उहाँले सरसफाइ अभियन्ताहरूको उत्साह, समर्पण र जिम्मेवारीभावको खुलेर प्रशंसा गर्नुभयो।
कार्यक्रममा सुरक्षानिकायका प्रतिनिधिहरूले पनि सक्रिय सहभागिता जनाएका थिए। उनीहरूले सरसफाइ जस्तै सामाजिक अभियानमा सुरक्षानिकाय सधैं साथमा रहने प्रतिबद्धता व्यक्त गरे। विद्यार्थीहरूको उत्साहजनक सहभागिताले अभियानलाई थप ऊर्जा प्रदान गरेको देखिन्थ्यो।
शहीद बेपत्ता स्मृति प्रतिष्ठान नेपाल अध्यक्ष – बसन्त कुमार श्रेष्ठ, उपाध्यक्ष – शरद ओली, सचिव-बीरेन्द्र बिक, सहसचीव- जस्मिन पौडेल, कोषाध्यक्षको अगुवाई रहेको थियो ।
सहिद बेपत्ता स्मृति प्रतिष्ठानका प्रतिनिधिहरूले सरसफाइ अभियानमार्फत सहिद र बेपत्ताको स्मृतिलाई सम्मान गर्दै समाज निर्माणमा सकारात्मक योगदान पुर्याउने उद्देश्य रहेको बताए। प्रतिष्ठानका अनुसार स्वच्छ वातावरणले नागरिकको स्वास्थ्य सुधार मात्र नभई सहरको सौन्दर्य र पहिचान समेत बलियो बनाउनेछ।
कार्यक्रममा सहभागी सञ्चारकर्मीहरूले सरसफाइ अभियानको प्रचार–प्रसार गरी आम नागरिकलाई सचेत बनाउने प्रतिबद्धता व्यक्त गरेका थिए। उनीहरूले नियमित सरसफाइ र फोहोर व्यवस्थापनबारे जनचेतना फैलाउन सञ्चार माध्यमको भूमिका महत्वपूर्ण हुने बताए।
आयोजकका अनुसार अबदेखि प्रत्येक हप्ता बुटवल बजारका फरक–फरक स्थानमा सरसफाइ कार्यक्रम सञ्चालन गरिनेछ। यसका लागि वडा कार्यालयहरू, स्थानीय संघ–संस्था, विद्यालय तथा स्वयंसेवकहरूसँग समन्वय गरिने जनाइएको छ।
स्थानीयवासीहरूले सरसफाइ अभियानको स्वागत गर्दै यसलाई निरन्तर र प्रभावकारी बनाउन आग्रह गरेका छन्। उनीहरूले फोहोर व्यवस्थापनका लागि स्थायी योजना, पर्याप्त डस्टबिनको व्यवस्था र नागरिक अनुशासनमा जोड दिनुपर्ने आवश्यकता औंल्याएका छन्।
नयाँ बसपार्कबाट सुरु भएको यो अभियानले बुटवललाई स्वच्छ, सफा र व्यवस्थित सहर बनाउने दिशामा सकारात्मक सन्देश दिएको छ। आयोजक तथा सहभागीहरूले सबै नागरिकको सक्रिय सहभागिताले मात्र स्वच्छ बुटवल निर्माण सम्भव हुने विश्वास व्यक्त गरेका छन।
