नवलपरासी, पुस २६
शंकर प्रसाद पोख्रेल
राष्ट्रिय जनमोर्चा (राजमो) पूर्वी नवलपरासीद्वारा आयोजित राजनीतिक प्रशिक्षण तथा बनभोज कार्यक्रम सफलतापूर्वक सम्पन्न भएको छ। संगठनलाई वैचारिक रूपमा सुदृढ बनाउने, कार्यकर्ताको राजनीतिक चेतनास्तर उकास्ने तथा आपसी एकता, सहकार्य र अनुशासनलाई मजबुत बनाउने उद्देश्यले आयोजना गरिएको उक्त कार्यक्रममा विभिन्न राजनीतिक दल, जनवर्गीय संगठन, बुद्धिजीवी, पत्रकार, जनप्रतिनिधि तथा सामाजिक अभियन्ताहरूको उल्लेखनीय उपस्थिति रहेको थियो।
कार्यक्रमका प्रमुख अतिथि अखिल नेपाल बुद्धिजीवी संघका सचिवालय सदस्य दुर्गानाथ खरेल रहनुभएको थियो। उहाँले राजनीतिक प्रशिक्षण सत्रमा विभिन्न दार्शनिक चिन्तन, राजनीतिक सिद्धान्त, नेपाली वाम आन्दोलनको ऐतिहासिक पृष्ठभूमि तथा वर्तमान राष्ट्रिय र अन्तर्राष्ट्रिय राजनीतिक अवस्थाबारे गहिरो विश्लेषण प्रस्तुत गर्नुभयो। खरेलले समाज रूपान्तरणका लागि वैचारिक स्पष्टता, संगठनात्मक अनुशासन र जनमुखी प्रतिबद्धता अपरिहार्य रहेको धारणा व्यक्त गर्नुभयो।
प्रमुख अतिथि खरेलले पूँजीवादी व्यवस्थाले सिर्जना गरेका आर्थिक, सामाजिक तथा राजनीतिक असमानताका कारण आम नागरिकले भोग्नुपरेका समस्याहरूको विस्तृत चर्चा गर्नुभयो। ती समस्याहरूको समाधानका लागि वैकल्पिक राजनीतिक मार्ग र विचारधाराको आवश्यकता औँल्याउँदै उहाँले “राजनीति सत्ता प्राप्तिको साधन मात्र नभई समाज परिवर्तनको प्रभावकारी माध्यम हो” भन्नुभयो। उहाँले राजनीतिक कार्यकर्ताहरूले विचार, व्यवहार र आचरणबीच एकरूपता कायम गर्नुपर्नेमा विशेष जोड दिनुभयो।
उहाँले वर्तमान नेपाली राजनीतिमा देखिएका अवसरवाद, व्यक्तिवाद र स्वार्थकेन्द्रित प्रवृत्तिले जनताको भरोसा कमजोर बनाउँदै लगेको उल्लेख गर्नुभयो। त्यसप्रकारका प्रवृत्तिविरुद्ध विचारप्रधान, मूल्यनिष्ठ र जनपक्षीय राजनीतिक अभ्यास आवश्यक रहेको उहाँको भनाइ थियो। साथै, शिक्षा, स्वास्थ्य, रोजगारी, कृषि र सामाजिक न्यायजस्ता जनजीवनसँग प्रत्यक्ष सम्बन्धित मुद्दालाई राजनीतिक आन्दोलनको केन्द्रमा राख्नुपर्ने आवश्यकता औँल्याउनुभयो।
कार्यक्रममा राष्ट्रिय जनमोर्चाका केन्द्रीय सदस्य भागिरथ शर्मा र दीपक पाण्डेले पार्टीको वर्तमान राजनीतिक कार्यदिशा, संगठन विस्तारको आवश्यकता तथा स्थानीय तहमा पार्टीको भूमिका विषयमा धारणा व्यक्त गर्नुभयो।
कार्यक्रममा प्युठान गौमुखी गाउँपालिका–५ का वडा अध्यक्ष बरुणध्वज मल्ल,
त्यसैगरी, अन्टुकका केन्द्रीय सदस्य सालिकराम सापकोटा, नेकपा मसाल जिल्ला प्रवक्ता चन्द्र सापकोटा, युवक संघका केन्द्रीय सल्लाहकार गोविन्द आम्माई, धनबहादुर सुपार्क, तराई–मधेस जनवादी मोर्चाका केन्द्रीय सदस्य रूपनारायण महतो, रक्तिमका कृष्ण गिरी, भक्तबहादुर उचै, मूल प्रवाहका केन्द्रीय सचिव प्रेम सापकोटा, युएई एकता समाजका प्रतिनिधि बाबुराम शर्मा, वडा सदस्य कृष्ण गीरी (वडा नं. १६), राजमो नगर समिति उपाध्यक्ष ऋषिराम कँडेल, मूल प्रवाहका सीपी सुवेदीलगायतले कार्यक्रमको महत्वबारे आ–आफ्ना धारणा राख्नुभएको थियो।
वक्ताहरूले राष्ट्रिय स्वाधीनता, लोकतन्त्र, सामाजिक न्याय तथा जनअधिकारका पक्षमा निरन्तर संघर्ष आवश्यक रहेकोमा जोड दिनुभयो। साथै, वर्तमान राजनीतिक परिवेशमा व्याप्त विकृति, विसंगति र भ्रष्टाचारविरुद्ध जनस्तरबाट चेतना अभिवृद्धि गर्न यस्ता राजनीतिक प्रशिक्षण कार्यक्रम प्रभावकारी हुने धारणा व्यक्त गर्नुभयो।
कार्यक्रमको अध्यक्षता राष्ट्रिय जनमोर्चा नवलपरासीका अध्यक्ष गिरिबहादुर महत्राले गर्नुभएको थियो। अध्यक्षीय मन्तव्यमा उहाँले पार्टीको नीति, सिद्धान्त र कार्यक्रमलाई जनतासम्म पुर्याउन यस्ता प्रशिक्षण, अन्तरक्रिया तथा एकता कार्यक्रमहरूलाई निरन्तरता दिइने प्रतिबद्धता व्यक्त गर्नुभयो। उहाँले कार्यकर्ताहरूलाई संगठनप्रति निष्ठावान् रहँदै जनताको विश्वास जित्ने गरी सक्रिय भूमिका निर्वाह गर्न आह्वान गर्नुभयो।
कार्यक्रमको सञ्चालन सचिव मानबहादुर रानाभाटले गर्नुभएको थियो भने स्वागत मन्तव्य तराई–मधेस जनवादी मोर्चाका केन्द्रीय सदस्य रूपनारायण महतोले राख्नुभएको थियो। स्वागत मन्तव्यका क्रममा उहाँले कार्यक्रमको उद्देश्यबारे प्रकाश पार्दै उपस्थित सम्पूर्ण अतिथि, वक्ता तथा सहभागीहरूप्रति आभार व्यक्त गर्नुभयो।
औपचारिक कार्यक्रमपश्चात् बनभोज कार्यक्रम आयोजना गरिएको थियो। बनभोज कार्यक्रममा सहभागीहरूबीच आपसी चिनजान, अनुभव आदान–प्रदान तथा सौहार्दपूर्ण छलफल भएको थियो। सहभागीहरूले यस्ता कार्यक्रमहरूले राजनीतिक कार्यकर्ताबीचको सम्बन्ध थप सुदृढ बनाउँदै संगठनलाई अझ व्यवस्थित र प्रभावकारी बनाउने विश्वास व्यक्त गरेका छन्।
समग्रमा, राष्ट्रिय जनमोर्चा पूर्वी नवलपरासीद्वारा आयोजित राजनीतिक प्रशिक्षण तथा बनभोज कार्यक्रम वैचारिक, संगठनात्मक तथा सामाजिक दृष्टिले अत्यन्त सफल र उपलब्धिमूलक रहेको निष्कर्ष सहभागीहरूले निकालेका थिय।
