बागलुङ, फागुन ७ – बागलुङ निर्वाचन क्षेत्र नं. १ मा साझा बाम गठबन्धनका उम्मेदवार कृष्ण अधिकारीले घरदैलो तथा जनभेट कार्यक्रमलाई तीव्रता दिएका छन्।
बिहीबार उनले बागलुङ नगरपालिकाको मुलपानी, तित्याङको डि–डाँडा, भकुण्डेको निफन्ने, काभ्रे, राँयडाँडाको कलावारी, भिर कटेरी, आफ्रे, तल्लोथर र सिम्ले लगायतका स्थानमा पुगेर मतदातासँग प्रत्यक्ष संवाद गरेका थिए। कार्यक्रममा उनले राष्ट्रियताको रक्षा, सामाजिक न्याय र विकासका एजेन्डालाई प्राथमिकतामा राख्दै ‘गिलास’ चुनाव चिन्हमा मतदान गर्न आग्रह गरे।
उम्मेदवार अधिकारीले गठबन्धनका साझा कार्यक्रमलाई जनतामाझ स्पष्ट पार्दै स्थिर राजनीति र स्वाभिमानको पक्षमा आफूहरू उभिएको बताए। स्थानीय बासिन्दासँगको छलफलमा रोजगारी, पूर्वाधार र सेवा–सुविधा विस्तारका विषयमा पनि कुराकानी भएको जनाइएको छ।
यस्तै, शुक्रबार जैमिनी नगरपालिकाको उपल्लो दमेक, तल्लो दमेक र पैंयुथन्थाप क्षेत्रमा घरदैलो तथा जनभेट कार्यक्रम तय गरिएको प्रचार टोलीले जनाएको छ। साझा बाम गठबन्धनले चुनावी अभियानलाई गाउँ–गाउँसम्म पुर्याउँदै समर्थन विस्तार गरिरहेको दाबी गरेको छ।
