काठमाडौंस्थित शीतलनिवासमा आज आयोजित विशेष समारोहबीच नवनियुक्त मन्त्रीहरूले पद तथा गोपनीयताको शपथ ग्रहण गरेका छन्। राष्ट्रपति रामचन्द्र पौडेलले प्रधानमन्त्री बालेन शाह नेतृत्वको मन्त्रिपरिषद्का १५ सदस्यलाई शपथ गराएका हुन्।
प्रधानमन्त्री शाहले पदभार सम्हालेसँगै मन्त्रिपरिषद् विस्तार गर्दै विभिन्न मन्त्रालयमा नयाँ अनुहारलाई जिम्मेवारी दिएका छन्। अर्थ मन्त्रालयको जिम्मा स्वर्णिम वाग्लेलाई दिइएको छ भने गृहमा सुदन गुरुङ, परराष्ट्रमा शिशिर खनाल र भौतिक पूर्वाधारमा सुनिल लम्साल नियुक्त भएका छन्।
त्यस्तै ऊर्जा मन्त्रालय विराजभक्त श्रेष्ठ, पर्यटन मन्त्रालय खडक पौडेल, शिक्षा मन्त्रालय सस्मित पोखरेल र स्वास्थ्य मन्त्रालय निशा मेहताले सम्हाल्ने भएका छन्। सञ्चार मन्त्रालयमा विक्रम तिमल्सिना, संघीय मामिला तथा सामान्य प्रशासनमा प्रतिभा रावल, कानून मन्त्रालयमा सोविता गौतमलाई जिम्मेवारी दिइएको छ।
कृषि मन्त्रालय गीता चौधरी, श्रम मन्त्रालय दीपक साह र महिला, बालबालिका तथा ज्येष्ठ नागरिक मन्त्रालय सीता वादीले नेतृत्व गर्नेछन्।
नवनियुक्त मन्त्रीहरूले शपथसँगै औपचारिक रूपमा आफ्नो कार्यभार सुरु गरेका छन्, जससँगै सरकारको कामकारबाहीले नयाँ गति लिने अपेक्षा गरिएको छ।