बुटवल, ५ वैशाख ।
बुटवल उपमहानगरपालिकाले बजार क्षेत्रमा गरेको पछिल्लो हस्तक्षेपप्रति बुटवलका चार प्रमुख व्यावसायिक संघसंस्थाहरूले गम्भीर ध्यानाकर्षण भएको जनाउँदै संयुक्त प्रेस विज्ञप्ति जारी गरेका छन्।
रुपन्देही व्यापार संघ, बुटवल उद्योग वाणिज्य संघ, रुपन्देही उद्योग संघ र उद्योग व्यापार संघले बुधबार एक विज्ञप्ति जारी गर्दै उपमहानगरपालिकाको कदमले विगतमा भएका सहमतिहरूको उल्लंघन गरेको ठहर गरेका हुन्।
विज्ञप्तिका मुख्य बुँदाहरू:
बलपूर्वक हस्तक्षेपको विरोध: गत वैशाख ३ गते बुटवलका अमरपथ, विपी चोक, राममन्दिर लाइन लगायतका क्षेत्रमा उपमहानगरपालिकाले बलपूर्वक गरेको कार्यप्रति व्यवसायीहरूले आपत्ति जनाएका छन्।
सहमति उल्लंघनको आरोप: व्यवसायीका सटर र पिलरभित्रका सामानहरू विना कुनै लेखाजोखा उठाइएको, सटरमा क्षति पुर्याइएको र अस्थायी पाली तथा होर्डिङ बोर्डहरू जफत गरिएको कार्यलाई संघसंस्थाहरूले सहमति विपरीतको कदम भनेका छन्।
फिर्ताको माग: उपमहानगरपालिकाले जफत गरेका सम्पूर्ण सामानहरू सम्बन्धित व्यवसायीलाई अविलम्ब फिर्ता गर्न र फुटपाथ तथा अस्थायी पालीका विषयमा स्पष्ट मापदण्ड तयार गर्न जोडदार माग गरिएको छ।
सहकार्यको अपिल: व्यवसायीहरूले बुटवलको सौन्दर्यीकरण, ट्राफिक व्यवस्थापन र पैदलयात्रीको सहजताका लागि आफूहरू सकारात्मक रहेको भन्दै सम्पूर्ण व्यवसायीहरूलाई यस कार्यमा सहयोग गर्न समेत अनुरोध गरेका छन्।
विज्ञप्तिमा रुपन्देही व्यापार संघका अध्यक्ष प्रकाश ढकाल, बुटवल उद्योग वाणिज्य संघका अध्यक्ष हरिप्रसाद अर्याल, रुपन्देही उद्योग संघका अध्यक्ष कृष्णप्रसाद पराजुली र उद्योग व्यापार संघका अध्यक्ष लोकनाथ पन्थीले हस्ताक्षर गर्नुभएको छ।
