राष्ट्रिय जनमोर्चाका अध्यक्ष चित्र बहादुर केसी ले विश्वभरका मजदुर वर्गले आफ्नो वास्तविक मुक्तिका लागि संगठित भएर संघर्ष गर्नुपर्ने बताएका छन्। १३७औँ अन्तर्राष्ट्रिय श्रमिक दिवसको अवसरमा बुटवलमा आयोजित कार्यक्रममा सम्बोधन गर्दै उनले वर्तमान विश्व व्यवस्था र नेपालभित्रको राजनीतिक अवस्थाबारे तीखा टिप्पणी गरेका हुन्।
केसीले आफ्नो सम्बोधनमा श्रमिक दिवसको ऐतिहासिक महत्व उल्लेख गर्दै यस दिवस केवल औपचारिक कार्यक्रमका लागि नभई श्रमिक वर्गको अधिकार, समानता र सम्मानको लागि संघर्ष गर्ने प्रतिबद्धता व्यक्त गर्ने दिन भएको बताए। उनले भने, “संसारका मजदुरहरू अझै पनि शोषण र अन्यायको चक्रमा फसेका छन्, त्यसबाट मुक्त हुन संगठित संघर्ष अपरिहार्य छ।”
उनले वर्तमान सरकारप्रति असन्तुष्टि व्यक्त गर्दै सरकार फासिवादतर्फ उन्मुख भएको आरोप लगाए। उनका अनुसार सरकारले लोकतान्त्रिक अधिकारहरू सीमित गर्दै विद्यार्थी संगठनहरू मात्र होइन, मजदुर संगठनहरूलाई समेत नियन्त्रण वा प्रतिबन्ध लगाउने नीति अपनाइरहेको छ। उनले यस्तो प्रवृत्ति लोकतन्त्रका लागि गम्भीर खतरा भएको बताए।
केसीले अझै अगाडि बढ्दै सरकार विदेशी प्रभावमा सञ्चालन भइरहेको आरोप पनि लगाए। उनले विशेषगरी अमेरिकी युथ काउन्सिललाई मान्यता दिन खोजिएको विषय उठाउँदै नेपालमा बाह्य शक्तिको प्रभाव बढ्दै गएको बताए। “सरकार सिआइएको रिमोटबाट चलिरहेको जस्तो देखिन्छ,” उनले टिप्पणी गरे, “यो राष्ट्रिय स्वाधीनता र जनताको हितविपरीत छ।”
उनले साम्राज्यवाद र सामन्तवादलाई मजदुर वर्गका मुख्य शत्रुका रूपमा चित्रण गर्दै ती शक्तिहरूविरुद्ध संयुक्त संघर्ष आवश्यक रहेको उल्लेख गरे। उनका अनुसार मजदुर, किसान र विद्यार्थी वर्गबीचको एकता नै परिवर्तनको मुख्य आधार हो। “यदि यी तीन वर्ग एकजुट भए भने कुनै पनि अन्यायपूर्ण शक्ति टिक्न सक्दैन,” उनले जोड दिए।
कार्यक्रममा अन्य वक्ताहरूले पनि श्रमिक दिवसको महत्व र वर्तमान राजनीतिक अवस्थाबारे आफ्नो धारणा राखेका थिए। कम्युनिष्ट सङ्ग्रहालयका अध्यक्ष चेतनानाथ आचार्य ले इतिहासमा मजदुर आन्दोलनले खेलेको भूमिकाबारे चर्चा गर्दै वर्तमान पुस्ताले त्यसबाट प्रेरणा लिनुपर्ने बताए। उनले मजदुरहरूको अधिकार सुनिश्चित गर्न राज्यले सकारात्मक भूमिका खेल्नुपर्नेमा जोड दिए।
त्यस्तै राष्ट्रिय जनमोर्चाका केन्द्रीय सल्लाहकार बद्रे आलम ले संगठनको मजबुती र विचारधारात्मक स्पष्टता आवश्यक रहेको बताए। उनले वर्तमान चुनौतीहरूको सामना गर्न कार्यकर्ताहरूलाई सक्रिय रहन आग्रह गरे।
बुद्धिजीवी वर्गका प्रतिनिधि दुर्गानाथ खरेल र ढुन्डिराज शर्मा ले श्रमिक आन्दोलनलाई वैचारिक रूपमा सुदृढ बनाउनुपर्ने आवश्यकता औँल्याए। उनीहरूले शिक्षा, चेतना र संगठनलाई सशक्त बनाउनु पर्नेमा जोड दिए।
यसैगरी लिला बहादुर केसी ले मजदुर वर्गको एकता र सक्रिय सहभागिता बिना सामाजिक न्याय सम्भव नभएको बताए। उनले वर्तमान परिस्थितिमा सबै प्रगतिशील शक्तिहरूबीच सहकार्य आवश्यक रहेको धारणा राखे। नेकपा मसालका जिल्ला प्रबक्ता लालचन्द पन्तले जनताहरुको मुक्तिको लागि संघर्ष आवश्यक रहेको बताय।
कार्यक्रममा विभिन्न जनवर्गीय संगठन, मजदुर संगठनका नेता तथा कार्यकर्ताहरूको उल्लेखनीय उपस्थिति रहेको थियो। सहभागीहरूले श्रमिक अधिकारको संरक्षण, रोजगारीको सुनिश्चितता, न्यूनतम पारिश्रमिक वृद्धि लगायतका विषयमा आवाज उठाएका थिए।
कार्यक्रमको अध्यक्षता कबिराज गिरीले गरेका थिए संचालन हरि बहादुर केसी र स्वागत भासण हुमकान्त अधिकारीले गरेका थिय।
